Le Direct

Pierre Savelli installé pour six ans supplémentaires dans le fauteuil de maire de Bastia, Gilles Simeoni n'écarte pas la présidence de la CAB

In un teatru di Bastia chì era, in gran’parti, daretu ad iddu, Pierre Savelli hè statu fattu merri pà i sei anni à vena.
A so squadra hè bedda rinova : Lisa Pellegri, Serge Linale è Didier Grassi lacani i so piazzi d’aghjunti à Lisandru de Zerbi, Laura Orsini-Sauli è Don Petru Luccioni.
In u so discorsu, hà dittu ch’iddu rigritaia d’ùn veda i cumunisti in l’uppusizioni. Po’ hà dittu ch’idd’era nicissaria di discorra cù i tindenzi llu naziunalismu chì, senza essa in associu cù a so squadra, ani cuntribuitu à u successu llu sicondu ghjiru.

Steti à senta à Pierre Savelli.

Gilles Simeoni, simplici cunsiglieri, conta di vultà in cunsigliu municipali è in cunsigliu cumunitariu, dopu à 4 anni senza essa ci, parvia lla so alizzioni à a prisidenza llu Cunsigliu Esecutivu lla Corsica.
Quand’iddu li si dumanda s’iddu sarà candidatu à a prisidenza lla CAB, ùn rispondi innò, ma inditta a cumpattibilità ghjuridica trà i dui prisidenzi.

Steti à senta à Gilles Simeoni.

L’uppusizioni, in quant’è ad idda, ùn hà risu tantu. Trà l’ottu eletti di « L’Unione per Bastia », unu si hè fattu friscià da una bedda parti llu publicu mittindu u so votu in l’urna : quissa hè successa à François Tatti.
Jean-Sébastien de Casalta, iddu, ùn l’hà presa a parolla, cuntintendu si d’issa curta dichjarazioni à l’escia llu cunsigliu municipali.

Steti lu à senta.

Julien Morganti, inveci, ùn si hè fermu mutu. Quiddu chì porta cù Viviane Albertelli u gruppu « Un futur pour Bastia », hè statu sciaccamanatu passendu à l’urna, è micca unicamenti da i soi. Eppuri, ùn si hè tinutu par criticà u bilanciu lla maiurità rieletta. Hà marcatu dinò a so diffarenza in sennu à l’uppusizioni.
A dici di manera chjara : s’iddu ci hè à veru travaddu in cunsigliu municipali, ci sarà. Sidinò, u favori sarà datu à u tarrenu.

Steti à senta à Julien Morganti