PADDUC et possible annulation partielle : les arguments de l'avocat des communes ayant attaqué le PADDUC
(A redazzioni d'Alta Frequenza) - Ssu ghjovi, u PADDUC, è più particularmenti a cartugrafia d'una parti di i spazi strategichi agriculi era à u centru di i dibattiti di u tribunali amministrativu di Bastia. Mentri chì a dicisioni sarà cunnisciuta u 1a di marzu, u rapurtadori publicu, Hugues Alladio, hà dumandatu l'annulazioni parziali di u PADDUC cuncirnendu i spazi strategichi agriculi dopu a dumanda di sei cumuni, chì sò Calvi, Purtivechju, Lecci, Eccica Suaredda, Algaghjola è Peri. Di più cà u fundamentu stessu di ss'ESA, hè un viziu di forma chì hè à u centru di l'inghjochi, postu chì a cartugrafia di l'ESA, è più particularmenti a so strisciata, hè cambiata assai trà quilla prisintata in inchiesta publica, è quilla vutata infini in u 2015 da l'Assemblea di Corsica di l'epica. Si tratta d'un affari di scala, a cartugrafia essendu à u 50 000esimu mentri chì u restu di u PADDUC hè stabilitu à u 100 000esimu. Pà a Cullittività di Corsica, hè u sbagliu matiriali currettu dopu chì hè difesu, è soprattuttu, i cunsighji di a Cullittività priciseghjani ch'ellu ùn hè micca u principiu di i spazi strategichi agriculi chì hè rimissu in causa, ma simpliciamenti a so strisciata nant'à calchì cumuna, un prublema chì pudarà essa risulutu s'ella ci duvia essa un'annulazioni parziali. Pà i cumuni chì ani postu ssi dumandi in annulazioni parziali di u PADDUC davanti u tribunali amministrativu di Bastia, l'argumentu di l'errori matiriali, currettu dopu, ùn teni micca. In più di què, c'hè stata, d'appressu à i cunsighji di i cumuni cuncirnati, una vera mancanza di trasparenza à ssu sughjettu, ciò chì ghjustificheghja sicondu elli ssa dumanda in annulazioni.
Steti à senta à maestru Patrice Vaillant, avucatu di i sei cumuni.
Sur le même sujet
