Nouvelles inscriptions sur les listes électorales: les accusations d'U Riacquistu di Portivechju
(A redazzioni d'Alta Frequenza) - A demucrazia pà l’altri è Baccalà pà Corsica ! Hè cù ss'infrasata più cà chjara chì Micheli Giraschi, candidatu U Riacquistu di Portivechju à i municipali, compii a so lettara aparta à u prifettu di Corsica. In ssa lettara, quissu quì parla di u sciffru pà a cità di Purtivechju à u nivellu di i scrizzioni novi nant'à i listi eletturali, tematica di u sempri in l'isula sana. A cità di u Sali hà arrighjistratu più di 1531 scritti in più (cù à mezu à quissi quì 537 cumunitarii è solu 128 ghjovani parsoni maiò) in u 2013, vali à dì una crescita di più di 35% di i scritti dipoi l'alizzioni municipali di u 2008, cù un numaru passendu da 7425 à più di 10 000 pà u 2014. Da induva venini tandu i dui terzi di ssi novi scritti ? Si tratta, d'appressu u Riacquistu di Portivechju, di prupietarii di residenzi sicundarii, di funziunarii è di mani d'opara di passaghju "sottu à a prissioni di calchì prumutori è intraprenadori di poca primura". Accusazioni gravi fatti quì da u partitu naziunalistu, cù a dinunzia di metudi chì poni cà "incuragiscia è fà crescia tutti i svianzi pussibuli". Micheli Giraschi lampa dunqua una chjama à u prifettu da fà chì misuri pulitichi cuncreti sighini presi pà fà la finita cù ssi meccanisimi.
Steti à senta à Micheli Giraschi.
