Neige en Haute-Corse : le point à 17 heures

(A redazzioni d'Alta Frequenza) - L'episodiu acquati nivati chì tocca a Corsica Suprana dipoi arimani (vennari) hà da cuntinuà à u minimu fin'è dumani (dumenica) à meziornu. Dopu à un tempu appena più calmu in principiu di dopu meziornu novi falati, più impurtanti, sò aspittati à partasi da 6 ori è fin'è 9 ori frà altru in Castagniccia è ind'u Curtinesi. Dumani (dumenica), à partasi da 5 ori di mani, un episodiu novu di nevi tuccarà u Nordu Livanti di u dipartimentu da i Fulelli fin'è Bastia nant'à u Capicorsu è u Nebbiu. I quantità di nevi sarani trà 2 è 5 cm. A cellula di crisi hè sempri attiva à a prifittura di Corsica Suprana. Tutta a ghjurnata, i mezi di a Cullettività Tarrituriali di Corsica è quilli di u Cunsighju Ghjinirali sò stati mubilizati nant'à u tarrenu da snivà i stradi, un'opara cumplicata da i nivati chì cuntinueghjani. U scopu ferma quillu di sgaghjà nanzi à a notti a maiò parti di i paesi di u Nebbiu, di a Castagniccia è di u Capicorsu. Dumani matina, l'uparazioni di snivamentu cuntinuarani. 21 squadri di u Serviziu dipartimintali di focu è di succorsu ghjirani pà i lochi i più tocchi ; tutta a ghjurnata ani arricatu parechji affari com'è u pani inde cumuni scantati. I spinghjifochi ani dinò traspurtatu medichi è pazienti ver di l'uspidali di Bastia è assistutu l'infirmieri duranti i so ghjiri. À 4 ori, ERDF cunfirmeghja chì u currenti hè statu ristabilitu inde tutti i casi di u dipartimentu. I timperaturi di notti fermani assai freti, falendu da 1 à -2 gradi nant'à a piaghja è u litturali, è da -3 à -9 gradi ind'i paesi di muntagna è di u centru. A notti, i cutratti si ghjiniralizeghjani ind'u centru è u cotru hè prisenti ad altitudina bassa. I cundizioni di circulazioni nant'à l'insemi di i stradi di Corsica Suprana fermani difficiuli par via di i risichi impurtanti di cotru. Hè scunsighjatu dinò di spiazzà di è quand'ella hè indispinsevuli ci voli à priveda pneu d'inguernu. Nanzi di pighjà a strada, hè cunsighjatu di tena si à capu di a situazioni chjamendu à u PC Nevi è d'avè arnesi spiciali. Infini, i cunsigni dati da i gistiunarii di vii o i servizii di securità devini essa rispittati.