Municipales à Bastia : Jean-Sébastien de Casalta dénonce 'la campagne de caniveau' menée selon lui par Pierre Savelli
Photo : Julien Pernici - Alta Frequenza
Hè sempri tesa bè a campagna pà i municipali in Bastia.
Di fatti, Jean-Sébastien de Casalta, u capifila di a lista « Unioni pà Bastia » rispondi à ciò ch’iddu hà dittu Pierre Savelli, merri di Bastia è capifila di « Bastia più forti insemi ». Dici chì iddu, si hè impignatu in a pulitica pà difenda idei è purtà prughjetti, par cuntrastà cù rispettu, micca par vultulià si in a campagna sputrita ind’iddu s’infanga u merri, chì attacca è imbrutti i parsoni.
« Semu in una crisa chì a squadra municipali ùn hè stata capaci à misurà la, è dispusizioni publichi da parà ni i cunsiquenzi ùn n’hà presu. Ma inveci, si ghjova di a miseria di l’aienti à fini alitturalisti » dici Jean-Sébastien de Casalta chì rimpruvarighja à Pierre Savelli i so parolli inghjuliosi è schifiziosi à ugni intarventu, masimu quand’iddu mintuvighja «usi di suttiscala » ma senza avè mancu u curaghju di dà calchì nomu quandì un ghjurnalistu ni faci dumanda.
Par Jean-Sébastien de Casalta, Pierre Savelli circa à piattà, fendu cusì, u bilanciu calamitosu lla municipalità è a so incapacità à gistì a cità.
In chjudenda, Jean-Sébastien de Casalta dici ch’iddu hè prontu, s’iddu ci voli, à metta in anda l’azzioni ghjudiziaria, da virificà sè l’alizzioni si hè fatta in a chjarura è a sincerità.
