Lingua corsa : Parlemu Corsu investisci u ghjardinu di a prifittura d'Aiacciu è copri l'ubeliscu di Pierre Jean Luciani
(Michaël Andreani - Alta Frequenza) - Azzioni simbolica nova di u cullittivu Parlemu Corsu ssu sabbatu dopu meziornu in Aiacciu. Dopu avè urganizatu una cunfarenza di stampa pà mandà un missaghju à u Statu, u Presidenti di a Republica è u rettori d’accademia, ma dinò à l’eletti corsi chì, pà u cullittivu, t’ani « pusizioni arcaichi » nant’à a lingua, parechji di i so membri ani dicisu d’entra inde u ghjardinu di a prifittura. Cù una scala, ani passatu u purtonu, è postu nant’à u famosu ubeliscu vulsutu da l’anzianu presidenti di u Cunsighju Dipartimintali di Corsica Suttana, Pierre Jean Luciani, un striscionu rivindicativu « Parlemu Corsu ». S’ellu hà bè capitu chì u Statu ùn cappiarà nulla nant’à a cuufficialità, u cullittivu dumanda una ghjiniralisazioni vera di u bislinguisimu inde l’educazioni è d’una manera glubali inde tutti i parti di a sucità corsa, senza ch’ella ci fussi bisognu di cambià a Custituzioni.
Steti à senta à Micheli Leccia pà u cullittivu Parlemu Corsu.
Sur le même sujet
