Législatives : Gilles Simeoni dénonce une irrégularité
Gilles Simeoni dénonce une irrégularité
(A redazzioni d’Alta Frequenza) - A campagna pà u sicondu ghjiru di i legislativi hà dighjà principiatu, è l’ambienzi duvaria essa assai disturbata ind’a prima circuscrizzioni di Corsica Suprana. In fatti, Gilles Simeoni, ghjuntu sicondu dumenica à sera, hà parlatu arimani (luni) di una storia chì d’appressu à Femu a Corsica saria accaduta nanzi à a sarratura di u scagnu centralizatori di l’anziana casa cumuna di Bastia. Militanti di Femu a Corsica, accumpagnati da Jean-Baptiste Arena, suppleenti di Gilles Simeoni, avariani rilevatu un’irregularità impurtanti. Quissi quì dicini chì i quaterni di firmaturi sariani spariti calchì minutu, u tempu à parè soiu chì d’altri parsoni pussini fà fotocoppii nanzi di rimetta lu in prifittura. A cunsultazioni è a coppia di i listi di firmaturi sò auturizati pà qualsiasi parsona, ma solu dopu à a rimissa in prifittura sicondu u codici eletturali. U candidatu hà fattu cunnoscia a situazioni à u prifettu di Corsica Suprana è à u prucuratori di a Republica, prisintendu li, d’appressu à ellu, elementi ughjettivi. U merri di Bastia, pà contu soiu, nega iss’accusazioni quì è pudaria pona una lagnanza pà dinunzia buciardosa.
