Le Direct

Le PNC mis en sommeil pour se fondre dans Femu a Corsica

(A redazzioni d'Alta Frequenza) - Ssa dumenica, duranti un’assemblea generali, u Partitu di a Nazione Corsa, u PNC, hà dicisu di mettasi in sonnu. Un affari nicissariu pà entra com’ellu ci voli inde Femu a Corsica, chì hà da aduniscia u PNC, Inseme è A Chjama dopu un’AG custitutiva u 15 d’uttrovi. L’uccasioni d’incalcà torna nant’à a vulintà d’autoditarminazioni purtata dipoi parechji anni da u PNC, malgradu u puntu fattu in fin di simana scorsa duranti una cunfarenza di stampa di Pè a Corsica. Nentru à Femu, i membri chì ghjunghjini da u PNC ani da difenda una brama d’ùn cumulà micca i mandati elettivi maiò è i funzioni maiò nentru à Femu a Corsica ; Ghjuvan Cristofanu Angelini dicendu à a tribuna chì ùn era micca pussibuli chì u presidenti di l’Esecutivu di Corsica, pocu impremi a so identità, sighi presidenti di Femu a Corsica. Un’AG cù Henri Malosse è Marc Antoine Campana, invitati, ma dinò cù Fabienne Giovannini, François Alfonsi è Nadine Nivaggioni, membri di u PNC in disaccordu parziali à u minimu cù a linea di Ghjuvan Cristofanu Angelini, è tutti abbastanza in rititu fora di quand’ella hè intarvinuta Nadine Nivaggioni, chì ferma dubbitosa nant’à l’autoditarminazioni. S’elli si lacani u tempu pà pudessi sprimà, Ghjuvan Cristofanu Angelini porta a brama di vulè fà senta a voci di u PNC in sonnu nentru à Femu.

Steti à senta à Ghjuvan Cristofanu Angelini.