Le plan Canicule niveau 2 déclenché en Corse
(A redazzioni d'Alta Frequenza) - U pianu Sulleoni nivellu 2 hè statu lanciatu da l'ARS. A ghjurnata s'annunzia com'è calda oghji (marti) nant'à a Corsica sana. In fatti, Météo France privedi timperaturi assai caldi, chì pudariani trapassà i 40 gradi in certi lochi. Arimani dighjà, i 40 gradi sò stati trapassati in Sartè è in Taravu, mentri chì ci ni semi avvicinati in Nebbiu è in Cinarca. A colpa à un ventu di u meziornu, chì ancu s'ellu ùn hè micca eccezziunali pà a Corsica, dumanda quantunqua misuri di prudenza. Hè par quissa chì i prifitturi di Corsica Suttana è di Corsica Suprana ani dicisu di lancià u nivellu Giallu di u pianu Sulleoni. Mentri ss'episodiu, chì pudaria durà parechji ghjorni, i parsoni sposti sò di sicuru i più debbuli, vali à dì i parsoni di più di 65 anni, i parsoni chì soffrini di un handicap, i malati, i donni incinti è i zitelli. Aldilà di i risichi pà i parsoni, l'autorità s'inchietani dinò di a situazioni à u nivellu di i fochi. U risicu hè altissimu di sicuru. Hè par quissa chì a prifittura di Corsica Suttana hà dicisu di pruibiscia u staziunamentu di tutti i vitturi in bor di strada dipartimintali 81 in Piana. Parechji lochi di muntagna sò pruibiti à i visitori. Si tratta di Piana in Corsica Suttana, è di Verghjellu, Manganellu, Tartagine, Melaghja, Fangu, Bunifatu è u tarritoriu di l'Agriate in Corsica Suprana.
Sur le même sujet
