Le Direct

Le PADDUC au centre de la session de l'Assemblée de Corse ces deux jours

(A redazzioni d'Alta Frequenza) - Ultima sissioni di l'Assemblea di Corsica nanzi à i vacanzi d'istati oghji (ghjovi). Dui ghjorni di dibattitu, cù u grossu cartulari di u PADDUC à u prugramma, è in introitu i tradiziunali quistioni urali à l'esecutivu. È s'hè parlatu assai di furmazioni stamani, frà altru cù a voghja di crià una scola ditta "de la 2ème chance", vulsuta da Jean-Jacques Panunzi. U presidenti di u cunsighju ghjinirali di Corsica Suttana hà ancu appughjatu a so argumentazioni nant'à u prughjettu di u futuru PADDUC. U schema di i furmazioni sanitaria è medicu suciali hè statu dinò l'ughjettu di una dumanda di Josette Risterucci pà u gruppu cumunistu. Daretu à què, quì dinò, u futuru PADDUC. Altra tematica nant'à u sughjettu, l'internatu d'eccellenza di Corti è l'intarrugazioni di Nadine Nivaggioni nant'à u sblucchimi di i fonfi pà a custruzzioni di un stabilimentu novu pà l'ANRU. Ind'u filu di issi quistioni, Jean Biancucci pà Femu a Corsica, s'hè intarissatu à a prublematica di l'impiecu. "Ci hè un'urghjenza", hà dittu iss'ultimu, addirizzendu si à Jean Zuccarelli presidenti di l'ADEC, è dumandendu di u colpu "una valutazioni di i pulitichi rializati". U PADDUC era più cà prisenti, ancu duranti i quistioni urali, cù u dibattitu impurtantissimu chì si tinarà fin'è dumani. Si sà, in fatti, chì una di i prublematichi maiò avanzata da a pupulazioni, ind'u quadru di una grandi inchiesta rializata prima à l'elaburazioni di issu ducumentu futuru hè l'alloghju. Inde st'idea quì, s'hè parlatu di u dispusitivu d'inquadramentu di i pighjoni. Inde st'idea, s'hè parlatu di u postu di a Corsica ind'a nova fasa di dicentralisazioni. Parchì chì parechji prughjetti inclusi ind'u futuru PADDUC, dumandarani una riforma custituziunali. Riforma ch'ellu ci vularà dinò à metta in ballu in rilazioni cù cartulari nant'à a fiscalità o a lingua corsa par asempiu. In risposta à Pierre Chaubon, chì presideghja a cumissioni di i cumpetenzi legislativi è di reguli di l'Assemblea, Paulu Giacobbi hà spressu torna una volta u so sintimu nant'à a nicissità a più grandi di ùn mancà micca u latu istituziunali di i riformi naziunali in corsu. Ci vularà d'altrondi à andà ancu più luntanu, à parè soiu.

Écoutez Paul Giacobbi.