Le FLNC revendique une série d'attentats
(A redazzioni d'Alta Frequenza) - U FLNC hà rivindicatu arimani (sabbatu) a seria d'attentati accaduti in Corsica dipoi l'11 di maghju scorsu, senza pricisà malgradu tuttu u ditaghju di l'azzioni. Iss'attentati cuncirnavani soprattuttu residenzi sicundarii. U muvimentu parla di un'azzioni rializata "contr'à a spugliata di a tarra". U FLNC priciseghja chì i so azzioni "ùn custitueghjani (micca) una missa in guardia o una minaccia ver di u novu puteri puliticu in postu" ma "si scrivini ind'a nostra lotta di iss'ultimi anni di pettu à a cresciata prugrammata di i minacci speculativi nant'à a nostra tarra". È l'urganisazioni d'aghjustà chì iss'attentati toccani "a svianza speculativa", "una di i minacci maiò pà l'intregità di u Populu Corsu". D'appressu à u FLNC, issa minaccia speculativa hè ancu di più gattiva chì ci hè "troppu ghjovani Corsi chì campani ogni ghjorni l'addisperu di ùn pudè truvà un alloghju degnu, ùn pinsendu mancu una stonda à sunnià di pudè custruiscia a so propia casa". Nant'à l'ultimi alizzioni prisidinziali, u muvimenti dici chì "oghji, ritruvemi sucialisti à u puteri in Francia. Li rammintemi, s'è ci n'era u bisognu, ch'elli sò l'eredi di quilli chì ani custruitu cù noi i dui ultimi statuti". U FLNC lampa dinò una chjama à l'Assemblea di Corsica da fà ch'ella pighjessi "misuri di primura", aghjustendu chì "u Statu Francesi duvarà ingaghjà si tandu ind'un prucidimentu d'arrigulamentu puliticu di a quistioni naziunali corsa".
Sur le même sujet
