Le Direct

Le blocage de la RN 197 levé par la FDSEA 2B

(A redazzioni d'Alta Frequenza) - Raprisintanti di a federazioni dipartimintali di i sindicati di sfruttadori agriculi di Corsica Suprana ani bluccatu da stamani (luni) fin'è a mità di u dopu meziornu a Strada Naziunali 197 à u nivellu d'Algaghjola. Iss'ultimi vuliani dinunzià a sprupriazioni d'unu di i soii nant'à a cumuna di Sant'Antuninu. Un attu dicisu d'appressu à a FDSEA da a merria, da fà custruiscia un parking nant'à u tarrenu cuncirnatu. A federazioni hà uttenutu dui punti d'accordu. Di fattu, un scontru si tinarà u marcuri u 26 di sittembri ind'a sottu prifettura di Calvi, in prisenza di u sottu prifettu, di u merri di Sant'Antuninu, di raprisanti di u mondu agriculu è di a FDSEA, chì chjamani d'altrondi à una mubilisazioni larga pà issu ghjornu quì. Eppo infini, a dicisioni di ghjustizia ublighendu a sprupriazioni ùn sarà micca appiecata par avà, postu chì ùn ci hè nisun accordu. L'agricultori pudarà dunqua cuntinuà à travaghjà nant'à u so tarrenu. Una mighjurazioni chì ùn impidisci micca malgradu tuttu a FDSEA di dinunzià una situazioni chì volta sempri in Balagna, cù una prissioni turistica forti com'è primu mutivu.

Écoutez Joseph Colombani.