La saison des feux a commencé en Corse
(A redazzioni d'Alta Frequenza) - 25 ettari di machja sò stati brusgiati ind'u centru di a Corsica. U focu chì s'hè dichjaratu arimani (dumenica), in fin di matinata nant'à a cumuna di Castifau hà mubilizatu parechji mezi umani è aerei. I squadri di spinghjifochi di Corti, Venacu, Ponte Leccia è di A Porta ani luttatu senza piantà da pruvà ad ammaistrà a situazioni. I suldati di u focu sò stati aiutati da dui Canadair ghjunti da cuntinenti duranti a ghjurnata. Stamani (luni), u focu ùn hè ancu spintu, ma a so sparghjera hè stata piantata. Spinghjifochi ani da trattà oramai l'affari chì fermani da ammaistrà daveru u sinistru. L'urighjini di issu focu ùn hè ancu cunnisciuta par avà. Eppo, sopra à Aiacciu, l'inchietudini hè stata maiò, dopu chì i servizii di u CODISS 2A, avissini ricivutu una chjama ammintendu un focu dichjaratu vicinu à l'uspidali di Castellucciu. Da schisà à u più è à lestra a sparghjera di issu sinistru, cinqui veiculi di spinghjifochi sò stati ingaghjati. U focu hè statu ammistratu à lestra, è nisun parsoni hè stata cacciata fora da i lochi. U focu hà distruttu 300 m2 di vegetazioni. A raghjoni : una dibbiera mal ammaistrata, allora chì l'impiecu di u focu hè pruibitu da i servizii prifetturali.
Sur le même sujet
