La pression incendiaire ne faiblit pas en Haute-Corse
(Michaël Andreani – Alta Frequenza) - Una prissioni impurtanti à u nivellu di i fochi in Corsica Suprana. In fatti, trenta fochi sò stati censati nant'à u dipartimentu, cù più di 300 ettari di vegetazioni sfracicati da i fiammi. Par avà, 18 sò stati spinti, è 12 sò sempri in corsu. Trè fochi, si sò d'altrondi assai spartuti, duranti u dopu meziornu : in Sant'Andria di u Boziu, sò oramai 70 ettari chì sò stati distrutti. In Zuani, 45 ettari sò partuti in fumi, inveci chì u più grossu sciffru hè custatatu da u cantu di Pianellu, cù più di 200 ettari calcinati. Uparazioni più cà difficiuli pà i spinghjifochi, ùn pudendu micca mubilizà elicotteri par asempiu, par via di cundizioni meteurulogichi assai pessimi, cù u ventu suffiendu di volti ancu fin'è 180 chilometri à l'ora, in Capicorsu par asempiu. Numarosi mezi sò sempri mubilizati sopralocu da pudè ammaistrà a situazioni. Una situazioni chì duvaria malgradu tuttu mighjurà si ind'a sirata, cù un ventu menu putenti.
