La guerre des parkings a bien lieu à Ajaccio
(A redazzioni d’Alta Frequenza) - A guerra di i parkings si farà o micca ? In tutti i casi, a municipalità d’Aiacciu ùn voli micca perda issa battaghja quì. Ind’una lettara aparta distribuita ind’i scatuli aiaccini, Simon Renucci voli riaffirmà, torna una volta, i raghjoni chì ani purtatu à l’elaburazioni di u novu pianu di spiazzamentu urbanu. Simon Renucci a dici di novu : a crescita di parcmetri in centru cità hè più cà nicissaria, parchì chì hà da parmetta di finanzià a custruzzioni di i parkings senza rimandà a spesa à tutti l’aiaccini, vali à dì senza passà à l’impositu. U scopu hè più cà chjaru : luttà contr’à i vitturi chì ùn movini mai da un postu, chì portani un colpu gattivu à a vitalità di u centru cità è chì custitueghjini, d’apressu à ellu, un’acquistu micca ghjustificatu di u spaziu publicu. È cuntinueghja cusì pricisendu chì i prezzi fatti sò quilli di u 2002 è assai di sottu di pettu à ciò chì asisti dighjà in Aiacciu. Verificazioni fatta sopralocu, emi pussutu custatà in fatti chì u staziunamentu nant’à u parking di u quai Nabuliò hè par avà di 468€ pà un mesi sanu contr’à solamenti 80€ dumandati in altri lochi pà u stessu tempu cù un prezzu pà residenti. Simon Renucci a priciseghja infini : a cunvenzioni cù u custruttori di u parking di u marcatu hà ricivutu l’accunsentu pienu è sanu di u cunsighju municipali. « Ùn cunteti micca nant’à noi da fà cuntinuà u lascià corra è pà schisà i nostri rispunsabilità » ; issa infrasata di cunclusioni ni dici assai nant’à a ditarminazioni di a squadra municipali da fà avanzà infini issu cartulari. In tutti i casi, à u nivellu puliticu, l’affari ùn ribomba tantu di a stessa manera. Stemi à senta à MarieAntoinette Santoni-Brunelli, cunsighjera tarrituriali chì stà ghjustu appuntu ind’u centru cità
Ecoutons Marie-Antoinette Santoni-Brunelli, conseillère territoriale qui habite justement en centre ville.
