La Corse en vigilance orange pluies/inondations dès ce lundi après-midi
(A redazzioni d'Alta Frequenza) - A Corsica hè in vigilenza arancia acquata è inundazioni. In fatti, à partasi da ssu luni dopu meziornu, ci hà da essa un tempu assai gattivu, soprattuttu nant’à a parti urientali. L’acquati sarani prima muderati eppo si rinfurzarani à partasi da stasera è soprattuttu in a nuttata trà luni è marti pà divintà forti o ancu certi volti intensi sottu à u timpurali. L’acquati sarani menu putenti à pocu à pocu marti dopu meziornu ma cuntinuarani à u minimu fin’è marti à sera. I cumuli aspittati trà luni è marti à sera : trà 100 è 200 mm nant’à una parti maiò di u latu urientali di l’isula, certi volti trà 200 è 300 mm (o ancu di più) vicinu à i monti (Castagniccia, Fium’Orbu, Alta Rocca…). A limita trà acquata è nivata sarà versu 1700m eppo 2000m. U gattivu tempu sarà accumpagnatu da un ventu forti da livanti chì pudarà trapassà certi volti i 100 chilometri à l’ora nant’à i zoni di u rilievu è i stremità di l’isula. Ssu ventu inghjinnarà marosuli forti nant’à a parti urientali, chì pudarani disturbà l’evacuazioni di l’acqua. A parti uccidintali sarà menu tocca da l’acquati forti. Ma, acquati sustinuti pudarani essa prisenti di manera tempuraria in u suttanu di l’isula è u Nebbiu.
Sur le même sujet
