La Collectivité de Corse demande au gouvernement de rendre publics les éléments en sa possession relatifs au - système mafieux - en Corse
In un articulu publicatu u 23 d’uttrovi à nantu à u situ internet di u ghjurnali « Le Monde », hè dittu chì a Ghjuridizzioni Interrighjunali Spicializata - a famosa JIRS – di Marseglia avaria trasmissu à u ministeru lla ghjustizia un raportu cunfindiziali, chì spieca a prisenza d’un sistema maffiosa in Corsica, è chì dumanda mezi in cunsiquenza da cumbatta lu.
« Un avendu ni cunniscenza llu cuntinutu d’issu raportu, ùn ci pudemu par avali sprima à issu sughjettu, masimu chì i metudi è affirmazioni lla JIRS sò stati à spissu criticati è sbuciardati, da i ghjuridizzioni di ghjudicamentu è da l’associ di difesa lli dritti, com’è a Liga lli Dritti di l’Omu », dicini in un cumunicatu cumunu a prisidenti di l’Assemblea di Corsica è u prisidenti di l’esecutivu.
Gilles Simeoni è Marie-Antoinette Maupertuis tenini à ramintà chì, u 26 di sittembri llu 2019, u lindumani di l’assassiniu di Massimu Susini, u Cunsigliu Esecutivu lla Corsica avia prupostu una sissioni spiciali di l’assemblea.
Attimpatu parvia di u Covid, issu dibattitu si duvaria fà in i mesi à vena.
Da pudè discorra è dicida in cunniscenza, l’udizioni ani mubilizatu parichji stituzioni, prufiziunali llu drittu, attori di a vita ecunomica, associ. Ùn sò chè i sirvizia llu statu ad avè ricusatu di participà à iss’udizioni è travaddi.
Issa scelta, ùn si pò capiscia, dicini i dui prisidenti.
« Postu ch’issu raportu mittaria in risaltu a intramissioni trà banditismu, ecunumia è pulitica… u statu devi fà a scelta lla chjarura… da luttà contru à issa intramissioni », dumandani i dui prisidenti.
A Cullittività di Corsica dumanda dunqua à u guvernu di renda publichi l’elementi chì sò in u so pussessu, è chì trattani llu sistema maffiosu in Corsica.
Sur le même sujet
