La 13e édition du festival de la BD d'Ajaccio ouvre ses portes vendredi
(A redazzioni d'Alta Frequenza) - Hè dopu dumani, vennari, ch'ella principiarà in Aiacciu a 13ima edizioni di u fistivali di i figuretti. Quist'annu, ci sarani autori di prima trinca cù artisti ghjunti da Francia sana, ma dinò da Spagna, Belgica o Bulgaria. À mezu à i maiò di ssa manifistazioni, Juanjo Guarnido, chì ghjunghji d'Andalucia, puntellu di i studii Disney è disegnatori di u best seller Blacksad, sarà prisenti. Ss'ultimu, dinò rializatori di filmi d'animazioni in clips, ci prisintarà a so ultima opara, Freak of the week. U disegnatori belgu Crisse (Atalante, Luuna, Canari) sarà dinò quì, com'è altri grandi nomi di i figuretti com'è Pierre Alary, Lucien Rollin, Philippe Luguy, Bob de Groot, Joël Parnotte o Espé. Ben intesu, autori corsi numarosi sarani prisenti com'è Bertocchini, Ristorcelli, Micheli o Raffalli. À u prugramma di i mostri, s'hè incalcatu quist'annu annant'à Titeuf, raprisintatu da 40 di i più grandi prufiziunali di u 9u arti francesi è belgu, ma dinò annant'à a maghjina ditta di u "vampirisme" ind'i figuretti cuntempuranei. Si trattarà dinò di a figuretta Aleria 1975, di Marvel è di mangas, à traversu attelli è prisintazioni di ss'arti giappunesi. L'ultimu Yakari in lingua corsa sarà prughjettatu dinò, in prisenza di i rializatori. Dedichi, dibattiti, filmi è attelli sò dunqua in u prugramma di ss'edizioni nova chì principiarà ssu vennari fin'è dumenica à sera in u palazzu di i Cungressi d'Aiacciu.
Lista cumpletta di l'autori : Eric Liberge, Philippe Luguy, Bob de Groot, Laurent Sieurac, François Plisson, Crisse, Stéphane Bileau, Yann Le Borgne, Joël Parnotte, Pascal Nino, François Ravard, Miceal O'Griafa, Curd Ridel, Inaki Holgado, Olivier Taduc, Sandro, Espé, Michel Espinosa, Stéphane Piatzszek, Eric Puech, Lucien Rollin, Lisandru Ristorcelli, Eric Rückstühl, Juanjo Guarnido, Frédéric Bertocchini, Laurent Hirn, Dominique Memmi, Serge Micheli, Robin Raffalli, Al Coutelis, Viktor Kalvachev, Pierre Alary, Laurence Baldetti.
