Karaté : Alexandra Feracci troisième au German Open Karaté Premier League en Allemagne
(A redazzioni d'Alta Frequenza) - A ghjovana karatéka Alexandra Feracci, di l'ACA Arti Marziali, era in cumpetizioni arimani (sabbatu) in u German Open Karaté Premier League in Alimagna, in Coburg. Trè simani dopu à u so bellu parcorsu in l'Open di Turchia, Alexandra Feracci s'hè classificata torna 3a di ssa cumpetizioni internaziunali. A ghjovana aiaccina hà battutu par asempiu l'Alimana Resch Martina, a Taliana Simeoni Rachel è l'Alimana Bleul Jasmin, campiona di u mondu in squadra è 3a in individuali in u 2014. Alexandra Feracci hà battutu dopu un'antra alimana, Heinrich Christine prima d'essa vinta in meza finali da a Hongkongesa Lau Mo Sheung (3-2). Ma l'Aiaccina hà trovu i risorzi tennichi è murali par imponasi in a so ultima partita contr'à a Bielorussia Yermakova Sviatlana (4-1), cullendu cusì annant'à a terza marchja di u podium di ssa cumpetizioni internaziunali prestigiosa.
