Invalidation des élections à la chambre des métiers de Haute-Corse
(A redazzioni d'Alta Frequenza) - L'alizzioni di a Camara di i Mistieri di Corsica Suprana ùn sò micca stati validati. Eccu a dicisioni di a corti amministrativa di Marseghja, chì hà dunqua cunfirmatu u ghjudiziu prununziatu una prima volta da u tribunali amministrativu di Bastia. Rammintemi ch'ellu era Michel Pierucci chì avia postu un ricorsu da cuntistà iss'alizzioni. I mutivi ritinuti : affari nicissarii chì ùn erani micca prisenti nant'à certi inviluppi. D'appressu à a ghjuridizioni, a cumissioni d'urganisazioni di l'alizzioni, "ùn hà micca fighjatu i dispusizioni di l'articulu 4 chì duviani purtà à ùn validà micca i voti cuncirnati". È, com'è "u numaru di voti prisintendu iss'irregularità ùn hè micca pussutu essa ditarminatu, un'incertezza tocca à u contu di i voti uttenuti da i dui listi prisenti". Ciò chì inghjenna dunqua l'urganisazioni d'alizzioni novi. Aspittendu iss'ultimi, una cummissioni hà da essa numata à lestra da a prifittura, da gistiscia l'affari di a Camara di Corsica Suprana.
