Le Direct

Incidents de Furiani et Bastia : un jeune homme condamné à dix-huit mois de prison dont six ferme

Ghjovi, era ghjudicatu in cumparizioni diretta un ghjovanottu di 19 anni, parvia di l’azzuffi di duminica scursu davanti à a caserna lli crs di Furiani è a prifittura di Bastia.

Infattatu da i forzi ditti di l’ordini, hè statu intarpillatu ghjunghjindu in Bastia. In a so vittura, ci saria statu un saccu cù 24 cocktail Molotov.
U ghjuvanottu hà dittu ch’iddu s’era fattu svultà u ciarbeddu da parsoni più anziani in tarrazza d’un caffè bastiacciu, è ch’iddu avia carriatu issu saccu, chì certi parsoni l’aviani datu in Furiani, par avvià lu sinu à a prifittura. Hà ricunnisciutu u ghjuvanottu chì, purtatu da u muvimentu, avia participatu ancu iddu à l’azzuffi, tirendu petri è rinviendu bombi lacrimatoghji à i forzi ditti di l’ordini.

U vici prucuratori lla ripublica hà dittu ch’idd’ùn s’era in un ghjocu videò, è chì i forzi di l’ordini ùn aviani micca dui o trè viti ! Hà dumandatu 18 mesa di prighjoni cù un annu fermu.

Aurelia Dominici-Campagna, l’avucata llu ghjuvanottu, hà dumandatu ch’iddu sichi assoltu in parti u so clienti, è ch’idd’ùn achi chè una pena attimpata, fendu rimarcà ch’iddu era travaddadori è senza storii, è chì, à 18 anni, sbagli ni faci tuttu u mondu.

Fatta fini, u ghjuvanottu hè statu cundannatu à mutivu di trasportu è ditinzioni di prudutti picciafocu o splusivi è viulenzi à parsoni dipusitarii lla forza publica.
Si hà buscu 18 mesa di prighjunia, sei di quissi issendu fermi, à fà via un braccettu elettronicu chì li pirmittarà di cuntinuvà a furmazioni ch’iddu suveta.

Steti à senta à Aurélia Dominici-Campagna, a so avucata.