Incendies en Corse : le point avec la Préfète
(A Ridazzioni d'Alta Frequenza) - Duminica, si hè fattu u bilanciu di i foca tarribuli ch’ani picciatu a Corsica issi dui ghjorna. A prifetta hà fattu u puntu pà a stampa, cù i sirvizii di u SIS 2A è di a ciandarmaria. Hà ramintatu chì sabbatu, sò scappati trè foca in Pumonti : unu in Sampolu (50 ettari), unu in Todda (80 ettari) è unu in Zonza / Santa Lucia di Portivechju (3 ettari) I venti viulenti ani datu forza à issi foca, aiutati da a poca umidità d’iss’andana. I primi elementi d’inchiesta lla ciandarmaria portani à pinsà ch’iddi sò dibbieri, mal’tinuti, ad avè li fatti parta. Sò stati cuntati 15 partenzi di foca pà u dipartimentu. In Cismonti, sò stati signalati 33 partenzi. Sò stati tocchi particularmenti Calinzana (1200 ettari), Siscu (65 ettari), Ghisoni (13 ettari) è Pied’ d’Orezza (10 ettari). Sò avviati i inchiesti da cunnoscia i causi d’issi foca, masimu quiddu di Balagna. I mezi aerii sò stati mubilizati in funzioni lla cunfigurazioni lli loca, è da a righjoni PACA sò ghjunti omini in più, à a riscossa. A prifetta hà vulsutu fà rimarcà ch’iddu tuccaia à ugnunu à rispunsabilizà si, eletti quant’è pupulazioni, da priveda è antivistà issi guai. Ùn ci hè bisognu à aspittà un arrestu lla prifittura par sapè ch’idd’ùn si ni faci, focu, i ghjorna di ventu, hà dittu Josiane Chevalier. Ugni cumuna devi fà un pianu cumunali di prutizzioni, da pudè agiscia pà u meddu di pettu à issi danni, chì ùn poni chè fà si più numarosi, cù u clima chì si hè dirigulatu.
Stemu à senta à Josiane Chevalier
