Incendie du hangar agricole de Charles Sisti : les réactions
Photo fb Chambre d'Agriculture de Région Corse - Camera Regiunale d‘ Agricultura
Sò stati numarosi i riazzioni, dopu ch’idda sichi picciata a rimissa agricula di Charles Sisti in Fium’Orbu.
U Partitu di a Nazioni Corsa manda tuttu u so sustegnu à l’agricultori è à i soi, agricultori in i Prunelli di u Fium’Orbu
« Tinimu à sprima à issa famidda di travaddadori di a tarra a noscia sulidarità è à accumpagnà, in i ghjorna à vena, a ripresa cumpletta di i so attività.
Di pettu à issa pessima situazioni – turraremu à parlà ni prestu – ùn si devini lacà invispì l’affari ma à u cuntrariu, ci voli ad avè a vulintà cullittiva di riabilità un dialugu cuntinivu ».
Par Cori in Fronti, « ùn ci n’hè piazza pà a i manipulazioni è i pruvucazioni ind’iddi volini purtà a Corsica certi. A situazioni dumanda una risposta cullittiva ».
A camara d’agricultura di a Corsica, par contu soiu, « teni à dì ch’idda hè impinsirita bè dopu à l’avinimenti successi issi pochi ori.
Mandemu tuttu u nosciu sustegnu à l’agricultori toccu da iss’avinimenti è li femu tistimugnanza di a noscia sulidarità longu à issi provi.
Issi travvieri mettini in risaltu i strappaturi di a sucità corsa. Ùn sò chè u dialugu, a rispunsabilità cullittiva è a ricirca di suluzioni duratoghji chì ani da permetta di francà si la di i tinsioni attuali.
A Camara d’Agricultura voli averta di u piriculu d’un chirchju cunflittuali trà Corsi.
I pruvucazioni, i metudi in suttu è i manuvri barbusini ùn poni chè cumprumetta a cuisioni suciali è indibulì l’avvena di a noscia agricultura.
In issu cuntestu, a noscia stituzioni ripeti incù forza a so missioni : difenda i intaressi di u mondu agriculu è fà opara da avvià risposti ghjusti, assistati è duratoghji.
Ni chjamemu à l’appacià, à a raghjoni è à a sulidarità », dici in chjudenda a Camara d’Agricultura.
