Le Direct

Incendie de Bastelica : 400 hectares de végétation détruits par les flammes

(A redazzioni d'Alta Frequenza) - L'uparazioni cuntinueghjani in Bastelica, induva hè partutu un focu ssu vennari à sera nant'à a strada par andà fin'è a stazioni di u Val d'Ese. Dopu una ricunniscenza aerea, u bilanciu, chì devi essa resu torna più finu, hè passatu à pocu pressu à 400 ettari di vegetazioni distrutti da i fiari. Cinqui spinghjifochi sò stati feriti mentri a so intarvinzioni, brusgiati à u sicondu gradu à i mani è in faccia. Dui t'avarani brusgiatu assai siveri, mentri chì i trè altri sariani stati menu tocchi. Trè camiò, da un'antra banda, sò stati distrutti à 100% è un quattriesimu hà cunnisciutu disguasti impurtanti. U focu hè sempri attivu, è più di centu spinghjifochi di u dipartimentu agiscini nant'à a zona, appughjati da aiuti di l'UIISC 5 di Corti, mentri chì dui Canadair chì duviani parta da Marignane versu 11 ori sò aspittati sopralocu. U ventu di settori livanti, chì s'hè calmatu mentri a matinata, si duvaria rinfurzà torna da quì à calchì ora. Da sapè chì a strada dipartimintali 27a chì porta fin'è Bastelica à a stazioni di u Val d'Ese hè sarrata, postu ch'ella hè riservata à i veiculi d'intarvinzioni, inghjinnendu di fattu a sarratura di a stazioni di ski. (ritrattu : SDIS 2A)