François Hollande veut déposer un projet de loi autour de la Charte des langues régionales
(A redazzioni d'Alta Frequenza) - U Presidenti di a Republica hà annunziatu ch'ellu saria postu da quì à pocu un prughjettu di legi custituziunali pà ratificà a Cartula aurupea di i lingui regiunali è minuritarii. Prumessa di campagna di François Hollande in u 2012, ssa ratificazioni dumanda una riforma di a Custituzioni. Ma, ùn ci duvaria micca essa referendum à ssu sughjettu, postu chì l'iniziativa hè quilla di u guvernu stessu. Inveci, ssa validazioni duvarà passà di manera ubligatoria da u Cungressu, è una maghjurità di i trè cinquesimi di quissu quì. Una ratificazioni chì t'hà soprattuttu una purtata simbolica; François Hollande hà chersu à a ministra di a Ghjustizia, Christiane Taubira, d'appruntà u testu par ch'ellu sighi à u prugramma di u Parlamentu u più prestu pussibuli.
