Le Direct

Football - Sans surprise, la SAS du GFCA a été liquidée ce lundi

Luni, ùn ci n’hè statu surpresa, in l’affari di u GFCA.

A sucità cumirciali (SAS) liata à a squadra hè stata missa in liquidazioni da u tribunali di cumerciu. U GFCA hà dunqua ghjucatu u so ultimu scontru lla staghjoni contru à Euga Ardziv, u 14 di ghjinnaghju.

In ridrizzamentu ghjudiziariu dipoi a fin’di dicembri, a SAS era in carica di a squadra maestra, chì era in Naziunali 3, è di a so riserva, chì era in R2.

A liquidazioni hà missu fini à a staghjoni di i dui squadri.

A sintenza era aspittata, è l’addistramenti erani stati suspesi issa sittimana.
Parichji ghjucadori ani dighjà presu a strada d’altri squadri, ma certi altri, par disgrazia, ùn ani trovu suluzioni.

Issa pessima nova, issu culpacciu hè duru à incascià pà u GFCA, ma una poca di spiranza ferma quantunca. U Gaz hè sempri vivu, gramazia à l’associu, chì gistisci i squadri di i ghjovani.

L’associu GFCA hà da essa intesu u 14 di frivaghju da u tribunali ghjudiziariu.
Cù u so scagnu novu, u GFCA andarà à iss’appuntamentu cù a spiranza di salvà si.

Par casu ch’iddu passi issa prova l’associu, a squadra di i maiori pudaria riparta pà a staghjoni ch’entri, in una divisioni righjunali ancu à difinì.