Le Direct

I prufiziunali di l’AC Aiacciu torrani à addistrà si, da appruntà a staghjoni 2019-20 di Liga 2.

Photo : AC Aiacciu

(A ridazzioni d'Alta Frequenza) -Marti, i prufiziunali di l’AC Aiacciu torrani à addistrà si, da appruntà a staghjoni 2019-20 di Liga 2.

Hè un primu cuntattu trà Olivier Pantaloni è u so effettivu, chì duvaria essa toccu da parichji muvimenta in i ghjorna à vena.

Par avali, si senti parlà di partenzi : Yann Boé-Kane à Le Mans, Riad Nouri in prima divisioni algiriana...

Bernard Casoni, l’addistradori di u Mouloudia, hà dittu in una intarvista ch’iddu li piaciaria ad avè l’attaccanti di l’AC Aiacciu in a so squadra.

Po’ ci hè dinò Foot Mercato, chì dici chì Bordeaux circaria à fà vena à Matteo Tramoni. Ma par avali, l’internaziunali U 19 t’hà un cuntrattu cù a squadra aiaccina.

Infini, è hè stata aghjà ditta, Yohan Cavalli, hà signatu un annu di più cù l’AC Aiacciu. Una signatura chì a squadra cunfirmarà dopu à u passaghju à a DNCG, a sittimana ch’entri.