Football (Ligue 2) - Bouhours, Delort et Diawara quittent l'AC Ajaccio pour Tours
(A redazzioni d'Alta Frequenza) - U FC Tours t'avarà un certu accentu corsu a staghjoni chì veni in Lega 2. Si sà dighjà chì Jean Marc Ettori, u patronu di Corsicatours, hè divintatu presidenti di u club ss'ultimi ghjorni, salvendu lu ancu di una falata in Naziunali da a DNCG. U purtivichjacciu sarà aiutatu da qualchissia di bè cunnisciutu in Pitretu Bichisgià, l'anzianu guardianu internaziunali di Monacu, è dirighjenti di Prupià, Jean Luc Ettori. Hè l'anzianu intrenori di l'AC Aiacciu, Olivier Pantaloni, chì intrenarà a squadra, aiutatu da un anzianu aiaccinu dinò, Alexandre Dujeux. À u nivellu di u marcatu, Olivier Pantaloni pighja elementi inde l'effettivu di l'AC Aiacciu, postu chì Fousseni Diawara è Andy Delort sò dighjà in Tours. Arimani (marti), Olivier Pantaloni ci cunfirmeghja chì a ghjunta di Samuel Bouhours, aiaccinu ssi dui ultimi staghjoni, hè guasgi fatta. Sarà à u Tours FC da quì à pocu. Infini, Nouré El Ourdani, l'intrenori di Prupià, hà da ghjunghja in Tours, pà intrenà l'U17. U FC Tours si busca ghjucadori avendu una sparienza di a Lega 1, mentri chì in Aiacciu, l'effettivu cuntinueghja à calà. Un affari vulsutu da i dirighjenti è l'intrenori Fabrizio Ravanelli. Oghji, dodici ghjucadori di l'effettivu di a staghjoni 2012-2013 di l'AC Aiacciu si ni sò andati.
Sur le même sujet
