Football (Ligue 1) - Victoire synonyme de maintien pour le SC Bastia à Rennes (0-1)
(A redazzioni d'Alta Frequenza) - Dopu à 12ima ghjurnata di Liga 1, erani pochi à scumetta annant'à un mantenimentu di u SC Bastia nanzi à l'ultima ghjurnata o ancu annant'à un mantenimentu tuttu simpliciamenti, eppuru guadagnendu 1-0 annant'à u tarrenu di Rennes, u Sporting hà ufficializatu a so piazza in prima divisioni a staghjoni chì veni. Un successu torna più bellu postu ch'ellu s'assumiglia à un hold up, luntanu da u famosu è dubbitosu cuntestu bastiacciu amintatu tanti volti da i so avversarii di a sirata pà pudè ghjustificà i so disfatti in campiunatu è in Cuppa di a Liga in Furiani. In fatti, i Brittoni ani duminatu guasgi à 100% ssu scontru, videndu ancu una rialisazioni ricusata duranti u prima tempu mentri chì u ballò, malgradu un'intarvinzioni di Peybernès, avia trapassatu a linea. Cù a sclusioni di Kamano à a 44ima minuta dopu à dui carti gialli, a seguita di a partita avia da essa più difficiuli. Ma u Sporting ci l'hà fatta à resista, certi volti bè aiutatu da piottuli chì ani sceltu u so cantu. À a 67ima minuta, dopu à una manu di Gillet, N'Tep hà vistu u so penalty arristatu da Areola. È infini, à a 78ima, bè sirvutu, Danic hà battutu cù un tiru à rasu di tarra u guardianu Costil pà dà a vittoria à u Sporting. Cù 46 punti è un dicesimu postu, u Sporting pudarà ghjucà i so dui ultimi scontri tranquillu, postu chì u mantenimentu ricumpensa u travaghju impurtantissimu di Ghislain Printant, di i so cullaburatori, è di una squadra chì hà ritrovu una vera forza dopu à l'accidenti di a sparienza Claude Makélélé.
Steti à senta à Ghislain Printant.
Sur le même sujet
