Football (Ligue 1) - L'ACA impuissant face à Monaco (0-2)
Una volta di più, issa duminica, l’AC Aiacciu hà persu in casa.
Issa disfatta contru à Monacu veni à cumplicà ancu di più a cursa pà u mantinimentu in prima divisioni.
Erani cursi 27 minuti quandì Caio Henrique truvaia à Maripan, via un calciu di pinalità, in i sei metra aiaccini. Benjamin Leroy paraia un primu tiru ma Ben Yedder ripiddaia a biscica à brusgiapilu, è mittia u primu marcu di a so squadra.
Dopu à u posu, l’aiaccini si faciani più prisenti.
Maripan, u difindidori di Monacu, pudaria essa statu sclusu parvia d’un gattivu gestu à nantu à Soumano, ma ùn hà buscu chè un avirtimentu.
Cinqui minuti dopu inveci, Bayala era sclusu parvia d’un tackle à nantu à Maripan.
L’aiaccini pruvaiani senza pichju à rivena à marcu pattu, ma cù un contr’attaccu, Diatta mittia un sicondu marcu pà Monacu.
Cù issa disfatta, l’AC Aiacciu s’infanga in i fundala di a classifica, l’ughjittivu di u mantinimentu issendu si cumplicatu bè.
