Football - Le FC Balagne jouera en National 3, l'US Corte en Régional 1
(A ridazzioni d'Alta Frequenza) - Pari ch’idda sichi compia marcuri, issa storia senza capu, nè codda, nè fini llu campiunatu di ghjocu à ballò llu 2018/19 di Righjunali 1. U scagnu esecutivu lla Liga di Ballò Amatori hà cunfirmatu a prisenza di u FC Balagna in Naziunali 3, à praghjudiziu di l’US Corti. Di regula, era Corti u campionu di Righjunali 1, ma dopu à un ricorsu llu FC Balagna contru à Furiani-Agliani, parvia lla prisenza d’un ghjucadori suspesu, a squadra balanina hè passata davanti à a squadra curtinesa.
Issa dicisioni hè cuntraria à quidda llu tribunali amministrativu di Bastia, data u 20 di luddu, chì avia dumandatu à a fidirazioni francesa di ballò di fà ghjucà l’US Corti in Naziunali 3.
A Liga di ballò amatori ghjustifichighja a so dicisioni cù quidda presa luni da a liga corsa di classificà u FC Balagna primu di Righjunali 1. Si rimarcarà chì a Liga Corsa avia dumandatu à a Liga llu ballò amatori di mantena i dui squadri in Naziunali 3.
L’affari duvaria marcà u ballò amatori isulanu, masimu chì l’US Corti, chì devi riparta in Righjunali 1, hà dittu ch’iddu si teni u drittu di purtà un altru ricorsu in tribunali amministrativu.
