Football (Coupe de France) - Louhans-Cuiseaux - SC Bastia et GFCO Ajaccio - Calvi pour le 8e tour
(A redazzioni d'Alta Frequenza) - Oghji à meziornu, i trè squadri corsi cuncurrendu pà l'ottesimu ghjiru di a Cuppa di Francia, ultima tappa nanzi à i 32imi di finali è a ghjunta di i furmazioni di Lega 1, ani cunnisciutu i so avversarii. Pà u Sporting Club di Bastia, sarà un spiazzamentu in cuntinenti. È sta volta quì, u nivellu sarà forsa più altu contr'à elli postu chì i ghjucadori di Federicu Hantz sarani upposti à Louhans-Cuiseaux, squadra di CFA 2 ind'u stessu gruppu chì a riserva di u Sporting. Pà ciò chì tocca à i dui altri furmazioni isulani, a sorti l'hà purtati ver di un bellu derby, postu chì u GFCO Aiacciu ricivarà à u FC Calvi, inde ciò chì sarà, senza nisunu dubbitu, una di i grossi cunfruntazioni di iss'ottesimu ghjiru. Una cunfruntazioni chì assicureghja dunqua a prisenza di una siconda squadra isulana in 32imi. I partiti si ghjucarani i 10 è 11 di dicembri.
