Football (coupe de France) - Le CAB passe, le GFCA et l'USCC trépassent
(A redazzioni d'Alta Frequenza) - Unu nant'à trè : eccu u bilanciu di i clubs corsi chì disputavani issa dumenicata u 7u ghjiru di a cuppa di Francia. È a grossa surpresa hè ghjunta d'Alsazia, duva u Gazélec d'Aiacciu (Lega 2) mezu finalistu di l'ultima edizioni s'hè fattu eliminà issa dumenica da a piccula furmazioni di CFA 2 di Saint Louis Neuweg, dui reti à zeru. Aiaccini chì ani ghjucatu à deci guasgi duranti tuttu u scontru, dopu à a sclusioni di u so guardianu Rastello. Fini di l'aventura dinò pà l'USC Corti, battuttu in Côte d'Azur da Saint Jean Beaulieu (DH), 3-1. L'unicu puntu pusitivu era da u cantu di Rhône, duva u CA Bastia (Naziunali) hà guadantu sabbatu contr'à Neuville sur Saône (PH). A scelta à a sorti di l'8u ghjiru si farà marcuri in Parighji, à a sedia di a FFF. L'AC Aiacciu è u SC Bastia ghjintrarani ind'a cumpetizioni par contu soiu è com'è tutti i l'altri clubs di Lega 1 à l'uccasioni di i 32i di finali, chì si ghjucarani principiu di ghjinnaghju di u 2013.
Sur le même sujet
