Football (Coupe de France) - Fortunes diverses pour les quatre clubs corses toujours en lice
(A redazzioni d'Alta Frequenza) - A scelta à a sorti di i 16i di finali di a cuppa di Francia di ballò hè stata fatta ssu luni à sera in Parighji. Nant'à i 32 squadri sempri in corsa, quattru clubs corsi, a prima volta ind'a storia di u ballò isulanu, erani cuncirnati à ssu nivellu di a cumpetizioni. U SC Bastia, furmazioni di Lega 1, ùn hà micca avutu una scelta cusì faciuli, postu chì u Sporting andarà ind'u Nordu di a Francia pà ghjucà contr'à u Racing Club de Lens, club di Lega 2. U CA Bastia, squadra di Lega 2, duvaria riceva un'antra squadra di a listessa divisioni, i Chamois Niortais; ma, u club di La Roche Vendée, eliminatu da u CAB, hà postu una riclamazioni pà ciò chì tocca a qualificazioni di un ghjucadori bastiacciu (Clément Fabre), ciò chì pudaria cambià tuttu s'è l'appellu di i cuntinintali duvia sbuccà. Un affari chì ci vularà à suvità... Unu di i clubs i più chjuchi pà ssi 16i di finali, L'Isula, furmazioni di CFA 2, hà da riceva in Corsica i Girondins de Bordeaux, squadra di Lega 1; un billissimu rigalu di Natali in ritardu pà i balanini chì pudarani ghjucà contr'à un club di u top 5 di a prima divisioni francesi. Da nutà chì ssu scontru si duvaria ghjucà in Aiacciu, duvaria essa in Mezavia, i stallazioni di u FBIR ùn parmittendu micca d'accoglia ssu gennaru di partita à ssu mumentu di a cumpetizioni. Infini, l'AC Aiacciu, club di Lega 1, hà da riceva in François Coty a squadra di Caen, chì hè ind'a prima parti di a classifica di a Lega 2, una scelta micca gattiva à dì la franca. Ssi scontri si ghjucarani u 21 è u 22 di ghjinnaghju.
