Evénements de Siscu : les réactions se multiplient
(A redazzioni d'Alta Frequenza) - I riazzioni cuntinueghjani dopu à l’evenimenti di a dumenicata scorsa in Siscu. Pà u Partitu Cumunistu Francesi, « L’evenimenti gravi di ssi dui ghjorni mettini in risaltu u periculu chì indebbulisci oramai a leia suciali è sfaci a sucità. Più cà mai, i valori republicani essenziali, chì sò a basa di u rispettu di tutti l’essari umani, pocu impremini i so urighjini, i so cridenzi o micca, devini passà nanzi tuttu. » Pà u sindicatu FSU, « u spaziu publicu ùn devi micca essa pulluatu da qualsiasi ideulugia pulitica rilighjosa chì ùn hà nulla à chì veda cù i santi scritturi. A FSU vularia è chjama tutti l’urganisazioni à atttivà torna i cumitati dipartimintali d’azzioni laica pà luttà contr’à i cumunutarisimi è cuntinuà à prumova i valori di fratellanza, di sulidarità è di u campà insemi in u rispettu di una laicità senza neguziatu pussibuli. » Pà contu soiu, u Rinnovu « cundanna l’agressioni di a piaghja di Siscu. Semi sulidarii di i Corsi agressati, cunfruntati à una situzioni intularabili è sustinimi a pupulazioni chì hà riagitu. Ci liemi à a dumanda di verità. S’è i fatti sò dimustrati, i segni ustentatorii è diktats rilighjosi ùn ani nulla à fà nant’à i nostri piaghji è ind’è noi. » Infini, u MCD cundanna d’una manera sivera l’evenimenti è susteni l’abitanti di ssa cumuna. Lampa una « chjama à u dialogu è à l’appaciata trà tutti l’abitanti di l’isula, aldilà di i so urighjini, di i so cunfessioni o i so cunvizzioni pulitichi. U prublema di i segni rilighjosi vistimentarii ustentatorii in u spaziu publicu devi fà parti di i sughjetti à dibatta duranti l’assisi urganizati à a riintrata à a dumanda di tutti i sinsibulità di l’Assemblea di Corsica nant’à u tema « in Corsica : chì mudellu di sucità è chì appartinenza citadina ? » »
Sur le même sujet
