Encore et toujours des incendies en Corse
(Michaël Andreani - Alta Frequenza) - Un focu s’hè dichjaratu arimani (dumenica) in Corsica Suprana, nant’à a cumuna di Suveria, vicinu à a Bocca d’Ominanda. Cù cundizioni meteurulogichi più cà gattivi, u ventu suffiendu à più di 70 chilometri à l’ora, i fiammi si sò sparti à lestra, calcinendu 45 ettari di pini, di lecci è di castagni. Impurtanti mezi umani, ma soprattuttu aerei, cù Tracker è Pelican, sò stati mubilizati da ammaistrà a situazioni. Uparazioni chì duvariani cuntinuà stamani, cù frà altru aiuti di Corsica Suttana. Da nutà chì un altru focu hè partutu à mità di dopu meziornu, in Ruglianu, in Capicorsu, sfracichendu 2 ettari di vegetazioni, inveci chì quilli impurtanti di Zuani è di Pianellu, di vennari, sò stati ammaistrati di modu definitivu.
Sur le même sujet
