Sarrula è Carcupinu : arrubeghji in un gran'magazenu
U 1u d’aprili llu 2019, u rispunsevuli lla sicurità d’un gran’ magazenu di Sarrula è Carcupinu hà spostu lagnanza, parvia di parichji arrubeghji di cunsoli di ghjocu, ghjochi videò è carti pagati capu nanzi.
Iss’arrubeghji sò successi da dicembri llu 2018 à marzu llu 2019, è ci ni saria pà 15000 €.
Dopu a dui mesa d’inchiesta, a ciandarmaria hà intarpillatu dui parsoni : u impiicatu chì ricivia i pacchetti è quiddu chì ni facia rimissa.
Una parti di a robba hè stata ritrova è ristituita. I dui omini duvariani passà in tribunali da quì à pocu.
