Des postes vacants dans l'Académie, des jeunes Corses tout de même mutés sur le continent
(A redazzioni d'Alta Frequenza) - Posti libari in Corsica è una mutazioni in cuntinenti ! Eccu a situazioni ch'ellu dinunzia un cullittivu di titulari novi di l'Educazioni naziunali, chì urganizava ssu marti da mani una cunfarenza di stampa davanti u Retturatu in Aiacciu. Ssi ghjovani prufissori, cunsighjeri principali d'educazioni, titulari di cuncorsi di l'insignamentu, chì sò pà certi maritati, pacsati, parenti, in situazioni di handicap o ancu studienti in tesa à l'Università di Corsica, ùn capiscini micca parchì i so dumandi pà travaghjà in Corsica ùn ani ricivutu nisun risposta da a parti di u Retturatu. D'appressu à ssi ghjovani corsi, ci sò decini di posti libari in ogni materia inde l'accademia, ma chì par raghjoni bughjettarii firmarani cusì o sarani occupati da cuntrattuali micca furmati. I titulari novi isulani sò distinati à parta par avà inde l'accademii di Parighji, Créteil o Nizza, ma ùn contani micca di stà senza fà nulla. Chjamani a pupulazioni, l'eletti è i candidati à l'alizzioni tarrituriali à participà à una riunioni ssu marcuri à 4 ori in Corti cù tutti l'attori suciali primurosi di l'educazioni inde l'isula. Prima, membri di u cullittivu scuntrarani ssu marcuri da mani u cunsighjeru esecutivu Petru Ghionga.
Steti à senta à Christelle Moretti, ghjovana CPE chì faci parti di u cullittivu.
