Départementales en Haute-Corse : le PRG présent à Bastia seulement
(A redazzioni d'Alta Frequenza) - C’era ssu ghjovi pà a prima volta dipoi parechji anni un’assemblea generali di a federazioni di Corsica Suprana di u Partitu Radicali di Manca. È d’una certa manera, a cumpusizioni di u publicu, soprattuttu bastiaccia, rispichjava ciò chì sarà a strategia di u PRG pà i dipartimintali di u mesi chì veni. In fatti, u PRG hà investitu solu trè duetti, annant’à i cantoni di Bastia II, Bastia III è Bastia IV, è susteni a candidatura di Jean Geronimi ind’u cantonu di Bastia I. Nisun candidatu investitu o appughjatu di manera ufficiali fora di i cunfini di a cità di Bastia, ciò chì pudarà stupiscia parechji parsoni quandu si sà chì a maghjurità dipartimintali attuali hè di culori radicali. S’ellu si pighja u partitu da u cantu di l’istanzi di u PRG di sustena di modu glubali quilli chì portani i valori radicali, i casi di u Capicorsu è di u cantonu di Golu-Merusaglia induva dui duetti vicini à u PRG sarani l’unu contr’à l’altru hà cumplicatu l’affari pà u partitu chì hà vulsutu dà piuttostu nisun sustegnu. Senza cuntà situazioni com’è quilla di u cantonu Bastia IV, induva Michel Simonpietri, successori di François Vendasi in casa cumuna di Furiani l’annu scorsu è chì t’hà parechij aghjunti chì sò membri di u PRG, duvaria avè u sustegnu micca ufficiali ma quantunqua à u minimu di l’allienzi trà manca, diritta è naziunalisti muderati in a cumunità d’agglumerazioni di Bastia.
Steti à senta à Alex Alessandrini, u presidenti di a federazioni cismuntinca di u PRG.
