Départementales en Haute-Corse : bilan positif pour la majorité

(A redazzioni d'Alta Frequenza) - Dopu à ssu prima ghjiru di i dipartimintali, dighjà ottu cantoni annant’à quindeci t’ani i so eletti. In Bastia, u sicondu cantonu hà vistu l’alizzioni di Jean Louis Milani è Anne Avenoso di a maghjurità municipali cù 55% di i voti. Senza surpresa, Jean Dominici (DVD) hè elettu torna cù Charlotte Terrighi in u cantonu di Borgu Lucciana cù 77,2% di i voti. Alizzioni larga dinò pà Yannick Castelli (maghjurità dipartimintali) è Michèle Vincentelli ind’u cantonu di Casinca Fiumaltu cù 80% di i voti. In Calvi, Jean Toussaint Guglielmacci (maghjurità dipartimintali) hè elettu torna cù Elisabeth Santelli è 72,3% di i voti. Micca luntanu, ind’u cantonu di L’Isula, hè Pierre Marie Mancini (maghjurità dipartimintali) chì hà vintu u so duellu contr’à Hyacinthe Mattei, Pierre Marie Mancini arrighjistrendu cù a so partinaria Antoinette Salducci 54,26%. In Corti, Petru Ghionga (maghjurità dipartimintali) è Marie Xavière Perfettini sò eletti torna cù 67,03% di i voti. In un cantonu d’A Ghisunaccia, Francis Giudici (maghjurità dipartimintali) è Marie Ange Pergola vincini cù 83,36%. Infini, in Castagniccia, Marc Antoine Nicolai è Emilie Albertini Franceschi (maghjurità dipartimintali) erani i soli in corsa è sò stati eletti cù 100% di i voti. In altrò, ci sò casi sfarenti. Ind’u prima cantonu di Bastia, Michel Rossi è Vanina le Bomin (maghjurità municipali) pudiani essa stati eletti ssa dumenica à sera ma ùn sò micca ghjunti à i 25% di i scritti nicissarii è duvarani dunqua prisintassi in un’alizzioni assai favurevuli contr’à Jean Geronimi è Laura Albertini (à manca). Ind’u quattriesimu cantonu di Bastia, Michel Simonpietri è Coralie Pruneta Leca (manca) cù 41,16% di i scritti sò in bunissima pusizioni contr’à Pierre Pieri è Elisabeth Fratacci Poggi (Inseme per Bastia) cù 18,25%, ssu cantonu essendu u teatru di una disfatta storica pà u Partitu Radicali di Manca inghjiru à 10% è chì hè trapassatu da u Front National à più di 17%. A lotta sarà spietata inde l’altri cantoni. Prima in Capicorsu induva Jacky Padovani è Danielle Vincent (manca) sò davanti à François Orlandi è Sylvie Retali (maghjurità dipartimintali) di una sissantina di voti. In u cantonu di Biguglia Nebbiu, u duellu di diritta batti par avà à prò di Claudy Olmeta è Muriel Beltran, chì cù 44,46% di i voti sò davanti à Claude Flori è Marie Hélène Nannini cù 42,42% di i voti. Ind’u terzu cantonu di Bastia, Marie Claire Poggi è Joseph Gandolfi (maghjurità municipali) sò in bona pusizioni contr’à Joseph Martelli è Anne Marie Piacentini (maghjurità dipartimintali) cù 38,44% contr’à 34,22%. Listessu affari pà Pierre Simeon de Buochberg (DVD) è Marinette Filippi (DVG) in u cantonu di Fiumorbu Castellu contr’à François Tiberi è Angèle Manfredi (maghjurità dipartimintali) cù 44,98% di i voti contr’à 37,85%. Infini, ind’u cantonu di Golu Merusaglia, u duellu di l’ultimi cunsighjeri di a maghjurità dipartimintali vidarà u duettu Jean-Marie Vecchioni - Catherine Cognetti-Turchini parta cù un picculu vantaghju annant’à u ticchettu Jacques Costa - Suzanne Giustignani, cù 37,15% contr’à 31,78%. Di manera glubali, a maghjurità dipartimintali duvaria pudè ritruvà un’avanza larga dumenica chì veni cù un numaru d’eletti impurtanti.

Steti à senta à François Orlandi, u presidenti di u Cunsighju Generali di Corsica Suprana.