Début du procès en appel des gîtes ruraux : le rôle de la chef de service passé au peigne fin
(A redazzioni d'Alta Frequenza) - Hè principiatu ssu luni u prucessu in appellu di l'affari di l'alloghji campagnoli, sei privenuti essendu ghjudicati da a Corti d'Appellu di Bastia. Dopu una matinata pà ramintà i fatti, induva Paul Giacobbi hà pricisatu ch'ellu era quì pà difenda u so unori, è Thierry Gamba Martini qualificà a so prima cundanna d'impassita, u dopu meziornu hè statu dedicatu guasgi di manera sana à u passaghju di Marie Laure le Mée, direttrici di i sirvizi in u Cunsighju Generali di Corsica Suprana à l'epica di i fatti. Duranti più di trè ori, hè stata intarrugata largamenti da a presidenti di a corti è da l'avucata generali. L'uccasioni pà Marie Laure le Mée di pricisà u so rollu cù daretu à què, l'ombra di Jean Leccia, u so superiori ierarchicu, tombu in u 2014 è di quali Marie Laure le Mée hà pricisatu ch'ella avaria prifiritu ch'ellu sighi à fiancu à elli duranti ssu prucessu. D'appressu à ella, ùn hà micca avutu u curaghju d'andà à dumandà conti à a so ierarchia par via d'una mancanza di sparienza malgradu cartulari micca cumpletti. Dinò, sempri d'appressu à ella, s'è Jean Leccia scrivia nomi di benefiziari, hè chì quissu quì t'avia infurmazioni pà falla, infurmazioni ghjunghjendu, sicondu a so risposta à a dumanda di a presidenti di a corti, da a presidenza di u cunsighju generali. Hà pricisatu dinò chì liati unu dopu à l'altru, ss'elementi eppo u fattu chì i benefiziari erani d'appressu à ella vicini à eletti di a cumissioni in carica di l'alloghji campagnoli o di a presidenza di u Cunsighju Generali rindia u scopu di ssu prucedimentu chjaru. Quissa quì era solu un elementu senza puteri d'appressu à a so avucata, maestra Marie Josée Bellagamba.
Steti à senta à Marie Josée Bellagamba.
Sur le même sujet
