Le Direct

Débat sur les déchets : majorité et opposition s'opposent vivement

Era capitiva ch’idd’ùn s’aviani da senta, à l’assemblea, maiurità è uppusizioni, pà u pianu tarrituriali di gistioni lli rumenzuli.

Ma a maiurità si hè fatta unita da difenda issu pianu, chì oramai sarà suttimissu à a inchiesta publica.

U prisidenti di l’Uffiziu di l’Ambienti hà prisintatu i punti maiori llu ducumentu : una gistioni integrata è glubalizata, a mutualisazioni di l’azzioni, a maistria publica, è un costu riduttu pà i cuntribuenti è l’ambienti.
François Sargentini vurria chì u travaddu d’ugnunu sichi spicificatu bè : CdC, statu, EPCI o Syvadec.

Po’ u prisidenti hà ripitutu chì a maiurità ricusaia u incinnaratori è i TMB.

Par iddu, a valurisazioni energetica devi essa studiata in un quadru beddu pricisu. Pà i centri d’accuzzera lli rumenzuli, u cunsiglieri esecutivu hà dittu ch’iddu ci vulia à tena si ni à certi diminsioni.

L’uppusizioni si hè fatta senta bè, dopu à issa prisintazioni. Hà parlatu di a poca chjarura, di l’ughjittivi pochi rialisti è di a cunfusioni nata da a poca scelta.

U dibattitu ci hè statu bè, par ciò chì tocca à l’usina di trascelta è valurisazioni energetica lla CAPA. Fatta fini, issu prughjettu hè statu scantatu da issu raportu.

Xavier Lacombe, elettu Per L’Avvene è viciprisidenti lla CAPA, hà dittu quant’idd’era scuntenti d’issa situazioni.

 

L’eletti lla maiurità sò stati uniti pà issa dicisioni, è François Sargentini, chì no’ stemu à senta, spieca parchì.