Cumpurtamentu di u Statu in u cartulari di l'OPH 2A : riazzioni di Gilles Simeoni
(M.Andreani & M.Lanfranchi - Alta Frequenza) - "Scunsulatu, scandalizatu, atterritu" ! Eccu i sintimi di u presidenti di l'Esecutivu di Corsica dopu à u votu cunsultativu di u Cumitatu regiunali di l'alloghju ssu ghjovi in prifittura di Corsica in Aiacciu. Ss'ultimu hà validatu in fatti (20 voti à prò, 7 contru è 6 astenzioni) a dumanda fatta da a CAPA d'essa riattaccata à l'Uffiziu Publicu di l'Alloghju di Corsica Suttana, mentri chì quissu quì duvia essa trasferitu à u 1a di ghjinnaghju, com'è l'Uffiziu di Corsica Suprana, à a cullittività unica, com'ella era privista inde l'urdinanzi di u guvernu à l'epica di Jean Michel Baylet. U Statu t'hà oramai dui mesi pà pighjà a so dicisioni difinitiva. S'è Gilles Simeoni accetta ssu votu, dinunzia inveci una pusizioni gravi di u prifettu chì hà avutu un pesu veru d'appressu à ellu nant'à u risultatu di ssu votu prununziendusi d'una manera chjara à prò di a dumanda di a CAPA. Pà u presidenti di l'Esecutivu, a CAPA è u Dipartimentu di Corsica Suttana, sustinuti è guarantiti da u raprisintanti di u Statu nant'à l'isula, ani viulatu cusì d'una manera sicura u spiritu di a legi è fattu saltà u statutu vulsutu da u legislatori, andendu contru à l'ingaghjamenti di u guvernu francesi, è vulsutu dinò da a Corsica. Una situazioni chì inchieta, incalca l'elettu.
Steti à senta à Gilles Simeoni.
Sur le même sujet
