Costa Concordia : Gérard Romiti prêt à une mobilisation en mer
(A redazzioni d'Alta Frequenza) - Ssu luni, in casa cumuna di Bastia, un numaru assai impurtanti d'eletti, di socioprufiziunali, sindicati è associ si sò aduniti pà urganizà a so mubilisazioni di pettu à u trasportu da quì à pocu di u Costa Concordia. Sciffri sprupusitati sò stati cumunicati ss'ultimi ori da u ministeru talianu di l'ambienti. In fatti, 163 tunnellati d'idrocarburi è d'oliu sò cuntinuti in fondu à u Concordia, com'è parechji centunai di millai di metri cubi d'acqua pulluata. Un battellu chì Gilles Simeoni, u merri di Bastia hà qualificatu di bomba à gallu, una bomba chì ghjustificheghja u passaghju à l'atti di l'unanimità di i parsoni prisenti à ssa riunioni, inchieti dinò par via di u ventu privistu duranti i ghjorni chì venini in Capicorsu. Una chjama, lampata da tutti i pulitichi corsi è un numaru impurtanti d'associ ambientali o micca, dumanda par asempiu à l'Italia risposti cridibuli è guaranzii pà ciò chì tocca a pertinenza di u locu di demulizioni, à u pumpamentu di i pulluanti, à a scelta di u traghjettu com'ellu hè avà, à i guaranzii à u nivellu di a gistioni di parechji scenari d'avarii è à a guaranzia chì u Concordia ùn si sciapparà micca in dui duranti u traghjettu. Un'antra dumanda, fatta quì à Ségolène Royal chì farà u viaghju annant'à u Jazon di a marina naziunali quandu u Concordia passarà davanti a Corsica, quilla d'uttena l'aghjurnamentu di u trasportu fin'è avè avutu i guaranzii chersi. Infini, s'è u trasportu si duvia passà senza nisun avanzata, una chjama à a manifestazioni terrestra è marittima hè lampata à u mumentu di u passaghju di u battellu davanti a Corsica. Una petizioni hè dinò in ligna annant'à u https://www.change.org/fr/petitions/stop-costa-concordia. À mezu à tutti i socioprufiziunali prisenti, c'era Gérard Romiti, presidenti di u cumitatu naziunali di i peschi marittimi. Quissu quì, assai inchietu par via di i cunsiquenzi eculugochi di un incidenti pussibuli duranti u trasportu di u Costa Concordia, hè prontu à manifistà in mari.
Steti à senta à Gérard Romiti.
