Coronavirus : les hôpitaux de Corse se préparent à gérer d'éventuels malades
(A ridazzioni d'Alta Frequenza) - Sta mani, u prifettu lla Corsica è i riprisintenti di l’ARS ani fattu una cunfarenza di stampa, par parlà di u coronavirus.
Parvia di a so vicinanza cù l’Italia - chì conta parichji casi, masimu in Lumbardia è in u Venetu – si porta un’attinzioni particulari à a Corsica.
Puri ùn issendu suspesi i passaghji trà l’isula è a tarra ferma taliana, una infurmazioni più pricisa sarà data à i passaghjeri.
Cuntrolli, partindu da Corsica o ghjunghjindu ci, ùn ci ni sarà, è si pudarà dunqua circulà in libartà.
Ma quantunca, l’auturità vurriani idintificà à u più prestu u minimu casu pussibuli. Cusì, hè dumandatu à ugni parsona ghjunta da una zona à risichi, è chì saria tocca da a tussi o da a frebba, di signalà si subbitu à u centru 15.
Ma ripetini u statu è l’ARS chì senza sintumi, risicu di cuntagioni ùn ci n’hè.
In Corsica, s’approntani i spidala, par casu ch’iddu ci volga à piddà in carica parsoni tocchi, à isulà li, è à fà viaghjà a capacità diagnostica. Tutti issi cosi sò privisti par essa fatti in rilazioni cù u spidali di a Timone, in Marseglia.
Stemu à senta à Franck Robine, u prifettu lla Corsica.
