Coronavirus : les chercheurs et médecins corses de Marseille et d'ailleurs soutiennent les demandes de la Corse
I prufissori di midicina, medichi, o circadori chì a Corsica l’ani à cori, si sò liati publicamenti à a chjama di l’esecutivu, di l’eletti è di a cumunità midicali di l’isula, da ch’idda poschi binifizià di u trattamentu di l’IHU di Marseglia contru à u Covid19.
Dominique Barbolosi, circadori è prufissori d’Università, vurria ch’idda sichi intesa issa chjama, à nomu di a ghjustizia di pettu à a malatia.
Masimu ch’issa dumanda si faci in u quadru d’una prova amaistrata è cuntrullata à u spidali.
A Corsica hè liata da quand’hè à Marseglia, ancu puri in u duminiu midicali, è oghji, u Covid 19 ùn devi rumpa issa liendula forti.
Stemu à senta à Dominique Barbolosi.
U prufissori Barbolosi hà parlatu dinò di a cusì ditta « randumisazioni », l’argumentu maestru di l’uppunenti à u studiu di i circadori di l’IHU di Marseglia.
Dici u prufissori d’Università chì, cù l’urgenza sanitaria, s’imponini, pà i provi midicali, altri mudelli d’analisi.
Ùn ci n’hè, etica, à dà à certi malati una midicina, è à d’altri un placebò, à nomu di a metudulugia, quand’idda hè in piriculu a vita.
Sè no’ semu in guerra, ci voli à misurà u scartu trà risicu è binifiziu. Oghji, pà i circadori di l’IHU, u binifiziu supranighja u risicu, masimu chì i muleculi aprudati sò cunnisciuti chì sò anni è anni.
Stemu à senta u prufissori Barbolosi.
Par finì, u prufissori Barbolosi, chì porta ricirchi à nantu à u cancaru, dici ch’iddu hè impinsiritu da i cusinquenzi di u Covid19, masimu par certi malati chì t’ani patulugii cronichi è chì rinunciani ad andà à u spidali, impauriti da u siscu.
Issi malati, hà dittu u prufissori Barbolosi, poni essa accolti in piena sicurità à u spidali.
Stemu lu à senta.
Sur le même sujet
