Conseils départementaux : le président de l'Assemblée de Corse réagit
(A redazzioni d'Alta Frequenza) - Dopu a cunfarenza di stampa di ssu luni d'eletti dipartimintali cuncirnendu i so parolli ricenti nant'à i cunsighji dipartimintali, u presidenti di l'Assemblea di Corsica, Ghjuvan Guidu Talamoni hà riagitu in un cumunicatu. "A me dichjarazioni di ghjovi scorsu, cù un testu chì hè statu diffusatu largamenti, ùn metti mai in causa i cunsighjeri dipartimintali di manera parsunali ma a stituzioni di chì i naziunalisti dumandani a suppressioni dipoi quaranta anni, arrimbendusi à a listessa argumentazioni, vali à dì i svianzi clientelisti ch'ella favurizeghja", dichjara Ghjuvan Guidu Talamoni. "Di fattu, a pusizioni, anziana, ch'aghju ripituta in seenza, ùn avia micca com'è scopu d'uffenda à calchissia, ciò ch'e ùn facciu mai, è soprattuttu micca inde l'eserciziu di i me funzioni di Presidenti di l'Assemblea di Corsica. D'altrondi, dopu a me intarvinzioni, nisun cunsighjeru dipartimintali, attuali o anzianu, prisenti inde l'emiciculu, hà riagitu. Da un'antra banda, i cosi essendu ciò ch'elli sò oghji, nigà i svianzi chì toccani i Cunsighji Dipartimintali vali à insultà l'evidenza è l'intellighjenza di i Corsi", cuntinueghja u presidenti di l'Assemblea di Corsica. "In cunsiquenza, ùn cambiaraghju mancu stampa u me discorsu, ch'e accertu cù serenità in u rispettu di i parsoni chì aghju sempri mantinutu : a nascita di una Corsica muderna è demucratica passa pà a fusioni di i trè cullittività à u 1a di ghjinnaghju di u 2018, in a cuncertazioni cù tutti l'attori cuncirnati, eletti è agenti di u serviziu publicu", compii ss'ultimu.
Sur le même sujet
