Le Direct

Conflit à la Méridionale : CM Holding, actionnaire de Corsica Linea, et le STC prennent la parole

Dopu à cinqui ghjorna di cunflittu suciali à a « Méridionale », sò parichji, i partiti impignati, ad avè cumunicatu issu marti.
CM Holding, azziunariu di a « Corsica Linea », riagisci à u cumpurtamentu di l’azziunarii di a « Méridionale » è à quiddu di i so impiicati. Dici cusì chì « 155 capi d’impresa corsi, membri di CM Holding, portani pienu sustegnu à Pascal Trojani, u prisidenti lla cumpagnia, à Pierre-Antoine Villanova, u dirittori ginirali, è à tutti i squadri di a cumpagnia, mubilizati senza pichju di pettu à u blucchimu à nantu à u portu di Marseglia, è à i danni iniziati da i marinari di a « Méridionale » chì sò in greva dipoi u 10 di ghjinnaghju. Tutti i squadri di « Corsica Linea » sò mubilizati da appruvistà quantunca a Corsica.
Issi capi d’impresa si dicini impinsirita di pettu à l’attitudina di u gruppu STEF, di pettu à quidda di a « Méridionale » è di i so impiicati. Quissi d’altrondi si sbagliani di lotta, masimu pinsendu à a scumissa d’un sirviziu marittimu lla Corsica duratoghju. I membri di CM Holding dicini ch’idd’hè nicissaria d’avè un ardignu navali di prima trinca, chì a si sfranchi di i tinsioni suciali »

In quantu à u STC, impinsiritu da u rimisciu, in cori à u sindicatu, trà marinari di i dui cumpagnii, hà presu a parolla, via u so sicritariu naziunali, Jean Brignole.
Ramenta u sindicatu ch’issu cunflittu « ùn devi uppona, ma’ ch’idda sia, l’impiicati di dui cumpagnii marittimi chì facini u sirviziu lla Corsica chì sò anni è anni. L’azzioni è i pusizioni di i sizzioni ùn devini andà contru à a filusuffia, l’uriintazioni ginirali è i statuti llu STC. Par sulidarità, i sizzioni si devini di sustena si, in i cunflitti impurtanti »
Pà u sindicatu, « a situazioni pudaria turrà dramatica, par tutti i nosci marinari. A sola suluzioni, da sicurizà l’avvena d’iss’impiicati, hè una risposta cumuna di i dui cumpagnii. Ni chjama dunqua à un accordu trà « Corsica Linea » è a « Méridionale ».
U STC, impinsiritu da a sorti di i so marinari è di u sirviziu publicu, dumanda ch’iddi sichini mantinuti, in u prughjettu à vena llu sirviziu marittimu lla Corsica, i dispusizioni ch’asistini chì sò quarant’anni. Issi dispusizioni erani sempri valevuli, sinu à u 30 di sittembri scursu. Sò in ghjocu chivi l’intaressu ginirali lla Corsica, a salvezza di l’impiechi è u statutu suciali di l’impiicati corsi.
Dumanda dunqua, u sindicatu, « un dialugu trà i dirigenti lli dui cumpagnii, chì pirmittaria à ugnunu di fà la finita cù issu cunflittu, è cù una certa dignità ».

Eppo’ u gruppu « Pà l’Avvena » di l’assemblea di Corsica ni chjama « à a rispunsabilità d’ugnunu, da ch’idda si finisca issa situazioni di blucchimu, cunsiquenza lla greva à a «Méridionale ». Hè suspesu cusì u sirviziu marittimu lla Corsica, hè disturbatu u principiu lla cuntinuvità tarrituriali, cù tanti cunsiquenzi par ciò chì tocca à l’appruvistà è à l’attività ecunomica. Una suluzioni ùn pudarà affaccà chè cù a discussioni, è in un ambiu appaciatu ».