Cinq mois de prison ferme requis contre Paul-Félix Benedetti pour violences et outrages envers un policier
(A ridazzioni d'Alta Frequenza) - Paul-Félix Benedetti, u capimachja llu partitu naziunalistu Core in Fronte, hè passatu marti in tribunali currizziunali, in Bastia. Hè incausatu par viulenzi è offesi à un pulizzieri, in fini di l’annata scursa. L’affari s’era passatu mentri chì u frateddu, Félix, era in prucessu in lu quadru d’un cartulari FIJAIT. Sustinutu in tribunali da u Cullittivu Patriotti, da u cunsiglieri esecutivu Saveriu Luciani è da tanti altri parsoni, Paul-Félix Benedetti hà nigatu d’avè fattu viulenza o offesi à issu pulizzieri, ma hà dittu ch’inveci hà ricivutu una bomba lacrimatoghja in corpu. U pulizzieri, iddu, ùn era partita civili : avia spostu lagnanza, ma l’hà cacciata u 9 di frivaghju. Dici, in una lettara à a pracura di Bastia, ch’idd’hè statu minacciatu di morti parvia d’issa lagnanza. U ministeru publicu, riprisintatu da Jennifer Roussie, a sustituta lla prucurattrici lla ripublica di Bastia, hà dumandatu quattru mesa fermi contru à Paul-Félix Benedetti, puntendu a so agrissività in tribunali, è un mesi in più par avè ricusatu un prilivamentu biulogicu. A sintenza hè aspittata pà u 26 di marzu à 2 ori llu dopu meziornu. In tantu,
Jean-Marc Lanfranchi, u so avucatu, si hè lagnatu di pata a mossa lli Ghjuvannali.
