Cinéma : sortie de Terra di i Turmenti, sur les années mouvementées du nationalisme corse
(A redazzioni d'Alta Frequenza) - Hè ssu marcuri a surtita ufficiali di "Terra di i Turmenti" ind'i sali scuri di Corsica. Un'opara chì u rializatori, De Gaulle Eid, prisenta com'è un filmu di più cà un ducumentariu annant'à l'annati i più caldi di u naziunalisimu corsu. Da Aleria fin'è a nascita di u FLNC, passendu pà a prima Assemblea di Corsica è infini a guerra trà naziunalisti, "Terra di i Turmenti" cummovi, faci scopra o scopra torna ssi tempi cù evenimenti chì ani stampatu a sucità corsa attuali. Un filmu, ed hè quì a so urighjinalità, inghjiru à un parsunaghju cintrali, u preti Mondoloni, omu di ghjesgia cù un parcorsu propiu particulari è assai liatu à a lotta naziunalista. Pà ssa surtita ufficiali, quattru prughjezzioni sò privisti ssu marcuri : in u sinemà l'Alba di Corti à 6 ori è mezu, in u Studio in Bastia à 7 ori, in u Fogata di L'Isula Rossa à 7 ori cù un dibattitu dopu è in u Centru Culturali di Sartè à 9 ori è quartu. Altri prughjezzioni : in u sinemà l'Alba di Corti u 22 d'uttrovi à 6 ori è mezu (cù un dibattitu), in u sinemà l'Excelsior in Prunelli di Fium'Orbu u listessu ghjornu à 9 ori è quartu, in u Spaziu Diamanti d'Aiacciu u 23 d'uttrovi è u 24 d'uttrovi (cù dibattitu) à 6 ori è quartu, in u Centru Culturali di Sartè u 23 d'uttrovi à 9 ori è quartu (cù dibattitu) è in u Centru Culturali di Purtivechju u 28 d'uttrovi à 6 ori è mezu.
Steti à senta à De Gaulle Eid, u rializatori, in un intrattenu longu di guasgi 20 minuti.
Sur le même sujet
